زجل

من البير خرج ريان وخلانا كل واحد فبيرو ما كاين لا دلو لا خيطان ما بقينا عارفين شنو نديرو الخو لخوه يْمَضِّي فالنيبان گاع ما گر فيه خيرو دا تسعة وتسعين سمان وقال المية ليا يصيرو والغني يبات فكرشو شبعان والفقير شكون سمع تغرغيرو يْلا صَبَّنْ يبات بردان وفالليل يسرقو نشيرو واليتيم ما لقاش قلوب حْنَان عايش مع القريب ونگيرو رزقو فغيبتو كلاه قطبان وبالخفة طفى مجاميرو فالعالم ما بقى أمان حتى لولاد كيطيرو هشام، حسين، وعدنان واللي غبر بقاو غير تصاويرو حتى الغيام ما بقى يبان الفلاح ضاع فتبكيرو باع البقرة والخرفان والراعي نسى تصفيرو حتى الذيب رجع ندمان على سابق تبذيرو قال يا بني الإنسان سامحوني وسيرو

قصة ريان  باسم الله العلي القدير  والحمد لله حمد أبدية  والصلاة والسلام على النبي البشير  وآله واصحابو المهدية  القلب وحتى القلم راه كسير  عذروني يلا خطيت فالقافية خبار يفجع جانا عبر الأثير خلى القلوب كلها مدمية قالو ريان طاح في وسط البير 32 ميط كيف الحية التقماتو وهو ما زال صغير ما دار لا ذنب لا معصية لا فالواقع لا فالتفكير لا فالاحلام حتى هيا كان يحلم غير بلوحة والطباشير يقرى ويحقق لوالديه الامنية لكن عند الله كلشي مقادير تنزل محسوبة بالغرام والوقية فيها ابتلاء للغني والفقير الخلق كلشي سواسية كيف المأمور كيف الأمير الله ابتلى حتى الرسل والأنبيا معاناتهم فيها لفهام تحير قصة سيدنا يوسف مازال طرية معانيها شلى كثير للنفوس فيها أدوية بعدما كان يوسف أسير عند الملك ولات مقامو علية معاه فكل حاجة يستشير يشرف على الخزاين المملية وسيدنا يعقوب ملي جاه البشير قميص ولدو شفاه بلا عملية بهاد القصة تفاءلنا خير وقصة سيدنا يونس حتى هي من بطن الحوت بربي يستجير دعوتو للآن مازالا منجية وسيدنا أيوب كان ضرو خطير قال رب إني مسني وتابوت سيدنا موسى صار وثير خداه اليم لعند فرعون الط...

 زادو في لسعار ما راعاوش للمسكين ما عندو دخل قار عايش غي بالدين حتى الوجه راه صفار خاصو غي الدفين فالشارع يهرب من التجار مسكين يخونوه الرجلين ما عندو لا درهم لا دينار ولا مونة في الخزين دارو ما فيها لا نمل لا فار لا فتات لا شظية من لعجين وولادو مازالين صغار مسكين ما صاب عوين حتى المرا مشغولة فالدار التربية وزيد التصبين ومول الدار رسلو اشعار يخلص ولا يخرج فالحين ما نفعو قريب ولا جار ولا المرشح  البدين دمعو سايل مدرار ما قدر يمد اليدين لغير الواحد القهار هو وحدو الحنين

المال يجيب المحبة ولو من راس الجبل كاع لا تسبب عند الطلبة لا تسحر لا توكل اللي ما عندو حبة كلشي عليه يتبدل يفارقوه بلا سبة يدوي يقولو هبل غير ديوه للطبا تاريخ صلاحيتو كمل يعطيوه خبز واتاي وجبة والغني يحطو لو عجل يسمعوه الكلمة الرطبة كلامو يجيهم قرآن مرتل يصفقو عليه فكل خطبة حتى ملي يسعل كل طلباتو تتلبى القانون على قبلو يتعدل فالرونج تحلالو الركبة وفين بغى يوصل يمشي يخطب يقولولو مرحبا بالخير الله يكمل والفقير يطردوه من العتبة هو والقالب اللي يحمل

 نوصيك يا ولدي بالصبر باب الصبر ما عليه زحام لا تدوي حتى تفكر واخا يجرحك الكلام ما يهمكش اللي يغدر كاين اللي هو والغدر توام احمد الله معاه ما كملت عمر نسى الماضي وشوف لقدام المحبة ما هي بسيف ولا بمجمر ولا بفيسبوك ولا بانستغرام لا تحزنش ملي لخيرك تبذر واخا من الشر تحصد عرام اللي مشى في طريقك يحفر حفاريه تزل بيه فيها لقدام عند الله كلشي مكتوب مقدر وصبر الصابر ما يمشيش حرام كاع الناس تتساوي في لقبر والظالم ما ينفعوش رخام

هاد الضرسة ما زالا تابعاني حرها ما بغى يهدا هو اللي دواني طلع لي فراسي القردة معاها راني نعاني كي نحط راسي على المخدة تقول النعاس واش جاني حرامت عليا الرگدة بقيت ساهر وحداني ما نشكي لحدا ربي اللي عالم كي راني في وسط هاد الشدة بعدما سيدي عافاني شحال من مدة اليوم كيف ابتلاني ليه الحمد لبدا سبحانو عظمتو وراني فضرسة صغيرة فالقدة

  قدر الله بسم الله قصيدتي موظفة والحمد لله بها الميزان يكمل والصلاة والسلام على النبي المصطفى والآل والصحب واللي احسن العمل من قدر الله ما تهرب خلفة قالوا زمان طيرو عينو من يغفل حنا حسبناها عين بنادم بالصفة ونسينا العين حتى للما تشمل نحكي لكم ما صار فزاوية الشرفا أهل بوراشد المدور بجبل نار كسكاسو قالوا ما تطفى رد بالك يا من عليها باغي تدفل غير القدر الخاوي اللي ينكفى أما العامر عمرو ما ينزل وإلى نزل يرجع يوفى سبع سنابل الناس منها تكيل من سورة يوسف جمعت الوقفة وفي سورة البقرة حطات الرحل المظلوم يحلى نعاسو فوق الحلفة والظالم يبات فالخطط يبدل بعض الناس بلا رخصة مولفة تبير في وطى وجبل ناضوا حفروا حاسي بالخفة بالصوندا ماشي بالمعول حادر في أرض حايفة خرج ماه كالثعبان مغول 50 ليتر فكل طرفة ماه للدزيرة راه وصل والعين اللي فالعقبة معرفة بدا يبان فيها الوحل نقص ما العين راهو كفى والزيتون على فراقو ذبل والبكما ولات مسكينة عجفة ما بقى فالولجة ما تاكل ذنوبها على ظهركم مستفة حتى لعند ربي يوم الفصل ما كان لا رشوة لا معرفة ولا معا من الظالم يتصل راسلناهم طلبنا منهم الوصفة مرضنا باين الطبيب لاش ...

ما يدوم حال ما قالوهاش صدفة اللي فراقهم ما يجيك للبال كل واحد فين گفى مشات كل أيام الوصال والفرحة كانت غير ضيفة لا تشريش الحسناء بالمال راك غير توريها الحرفة تبدلك بلي دازك بريال غي تشوفو تجمع الوقفة تخليك مصدوم بحال التمثال ويلا تحركت حركتك غير رجفة يا إنسان كيفاش تطلب الكمال وانت أصلك نطفة ما يدوم حال ودوام الحال غير طرفة ما نيش نسيء الفال ولا نسخر ولا نتشفى الايام بين الناس دوال وكلنا مسگيين بمغرفة حتى أنا شحال قريت من امثال وملي طبقت غلطت فالوصفة حضنت ثعبان بالبرد ذبال وتلوى عليا منين دفى ما يدوم حال لا تغرك الولفة اللي قطعت لعندو لميال توصلو يردك بالحفا

 كيفاش يحلى نعاسك يا واكل رزق ليتيم من النار درت لباسك الموديل آخر تصميم تفصل لحكام على مقاسك الورد تردو برسيم كيفاش يكون احساسك لوكان ولدك كان يتيم ما زال يريب ساسك وذريتك يضربها ضيم فالغابة ينصل فاسك وتولي تجمع فالگديم فالاخرة يمشي باسك ويكون الله ليك خصيم هاك قرى كراسك يجبدو ليك الجديد والقديم قدام الله تقطع انفاسك كلامك همس وتبرگيم تفضح قدام ناسك يعرفوك من الحرام كنت فنعيم الشيطان اللي غرك ساسك ورماك وسط الجحيم يقولك لوم راسك أنت اللي كنت غشيم

 شداتني الضرسة في هاد الليل وما بغات ترسى حرها ردني ذليل كل ما يتقسى لعندها يميل حرمت عليا الجلسة مع لحباب ولخليل وزادتني فقسة غير نتفرج فالطبسيل دموعي داير ليها دسة لو كان كنت وحدي تسيل دارت لي هسة راسي عليا ثقيل كتبت باش ننسى الله يدير شي تاويل يحمد ربي اللي بالعافية تكسى واخا يكون المال قليل تفهمني الناس اللي حاسة ومجربة هاد الويل الله يعافيكم من الضرسة ويشافي كل عليل

 راني بقيتْ مكتف والسلاسل بيا داروا ماذا بيا بديت نرفرف الزمان رماني بحجارو راني بقيت مكتف والسلاسل بيا داروا يا ربي انْتَيَا تلطف باللّي غابوا جوارو عبدك حشم يوصف وانت عالم بأسرارو دَرْك فأمرو مُصَرَّفْ حتى تجيه اخبارو راني بقيتْ مكتف والفقها فيا حاروا اللي نجيه يزيد يكرف فاش نفعني تبخارو يا ربّي ليك مديتْ الكف وجميعْ الخلق عندي باروا جَلَّ مَنْ ليْسَ يُوصَفْ ﮔاع ما حصاوه ذكارو ياك ليه ما نحتاج ظرف مجيب العبد فاضطرارو فبابو ما تشد صف هكذا جا فالقرآن وسوارو وملي قريتْ سورة يوسفْ كلشي همومي طاروا

 يا اللي كتدير الثقة فالناس من كثرة لصحاب رد بالك حلاوة الفم ماشي مقياس يلا ما عاشرتْ ما جربتْ بمالك اللي يقولك كي بقيت؟ قولّو لاباس لا تشكي عليه لا تحكيلو على اهوالك قدامك يقول الله يحد الباس وملي تفارقو يتشفى فحالك اللي يقولك قدمك على الشوك داس لا تيقو غير يلا شفتْ نعالك راه بكذوبو يعاديك مع الناس ويحط لك القدم فالمهالك الضرسة اللي تحسبها عاقلة لضراس توجعك فالليل وتزيد فهبالك تبات مسهراك بلا نعاس وحتى عقل ما يبقى لك يا اللي كتدير الثقة فالناس من كثرة لصحاب رد بالك حلاوة الفم آخرها تسواس واللي حسبتو فيمينك تصيبو فشمالك

 نتمنى تكوني فاهماني وما تحسبيش صراحتي ذنب كلمة ما قدرتْ نقولها بلساني أنت آية من آيات الرب بغيت نوصفك ما لقيت معاني وحتى لقلم بالسيف كتب ما عرفتش واش دارها بلعاني ولا بغى الوقت الأنسب ملي تتحقق ان شا الله الأماني تكوني امراتي وربي ما يغضب معاك الساعات تولي ثواني والساعة الزايدة غا تزرب في "كتاب الوجه" ربّي بيك لاقاني وقصتي معاك فيها لعجبْ بحر هاد الحب دَّاكْ ودَّاني تقول من عند الله توهب أنتِ روح ساكنة في بدني شمس حبك عمرها تغرب إلا يْلا بغيتي واحد ثاني وتعرفيني صادق ما نكذب منْ غير يْكونْ بالك انتِ هاني ما عندي ما نطلبْ

المرا لحنينة كاس عامر تبكي عليه فالحين يفيض تشرب منو ما يخليك ساهر ويداويك يلا كنت مريض والمرا القاسية كاس مقلوب تبكي عليه ما ترطب جوفو خاوي ما فيه حتى مشروب غير يزيد عطشك منينْ تشوفو

 يا اللّي تفكر اليوم فالزواج سمع لي قبل ما تدخل سواقو بحر لغرام راه مالح أجاج مول النية عمر منو ابريقو والحاذق شحال عام فيه وماج بالحق ما شرب منو ما ذاقو يا اللّي تفكر اليوم فالزواج سمع لي قبل ما تدخل سواقو شحال من بحر راسي غدر وهاج والعشاق اللّي ركبوه تساقُوا يا اللّي تفكر اليوم فالزواج سمع لي قبل ما تدخل سواقو المسمار اللّي غير دَّقو يبدا يعواج من الاول لا دِّير الغرة على تعلاقو يا اللّي تفكر اليوم فالزواج سمع لي قبل ما تدخل سواقو تزوج اللّي يديرك فوق راسو تاج يداوي جرحك ما يغرَّق فاعماقو

 الحب ماشي غير كلمة تقولها وتنساها ولا صورة فالما نسمة تغير صفاها الحب ماشي برية مْلَغمة تتردد عاد تقراها ولا أزرار مرقمة تبات ساهر معاها اللي يحبك يحبك فالزحمة يعرف قيمتك فخفاها يحس روحو وروحك تواما جوج من ربعين تتماهى كلمة الحب مودة ورحمة فالقرآن هكذا معناها لغة ما تحتاج لترجمة سيدنا يعقوب تعلمها وقراها ريح ولدو يوسف هبت نسمة بمجرد ما العيرْ بداتْ خطاها بعدما كان من الحزن تعمى غير قميص منو عينو داواها الحب يعطي لأي حاجة قيمة يلا كانت من الحبيب غير أراها واخّا سنوات فالسجن تترمى الحب قيمة يا محلاها الحب رجَّعْ زليخة أمَة تقر بالحق وتستغفر مولاها حبّو فقلبها تزرع ونْمَا وبلّي حباتو ربّي لاقاها سبحانه عارف كل أجل تسمَّى وكل أنثى آش كاين فحشاها قساوة الأقدار فوسطها حكمة واخا يغيب علينا معناها يجي يوم تزول الظلمة والشمس تنشر سناها واخا الإنس والجن يتجمعُواْ لمَّة ما يردّوشْ اللي ربّي كتبها ومحاها

ودعتك بدموعي والدموع حبر القافية ما خليت فيك حبيبة ليها يكون رجوعي ولا عنوان تجيني فيه بريَّة ودعتك بدموعي وألفين وثمنية فاليومية تقويم هجري ويسوعي ﮔاع بهم ايامي مطوية ودعتك بدموعي والدموع سالت أودية همّْ بريتي ما حملو ساعي سلامي وصلتو بيديا ما عندي قانون لإبداعي هايم بين القصايدْ المنسية

 مثلت الحب فرس بلا لجام ما يسوقو غير اللي ركبو بالمقلوب يوالف اللي سايسو بحلاوة لكلام وعمرلو وذنو غير كذوب مثلت الحب فرس بلا لجام ما يركبو غير اللي عينو معصوب بغيت نركبو وزلت بيا لقدام على وجهي جابني مكبوب قلت ليه علاش تبغي لخصام؟! قالّي هادشي فزهرك مكتوب لا تحب لا تبّعْ الغرام إلا يْلا كان عندك صبر أيوب

يا اللّي تقولِّي كيف كان الفراق؟! الفراق راه كان صعيب كيف السم ما لقيت لو ترياق لا فطب حديث لا تعشيب جرح قلبي زادُو لو لعماق ما برى ما نفع معاه طبيب والطابلو طحالُو تعلاق تلّي رقمك وسبّق رقم لحبيب فرحتْ لنجاحها ونسيتْ الفراق والبسمة فوجهي ما بغاتْ تغيب ونجاحي بسال ما بقالو مذاق خسارتي لفاتحة منها القلب يطيبْ خفت نبكي يقولوا هذا لحماق حتى نجح عاد جاه النحيب نعذرهم فالخسارة اختلفت لذواق كاين اللي "الباك" كان دايرو لحبيب يا اللي خسرت معايا دير اتفاق خذ "باكي" وجيب لي غير فاتحة نصيب يا اللي تقولّي كيف كان الفراق؟! الفراق راه الرضيع فيه يشيب كان بالعين ماشي بالتعناق والمحبوب حلف ما يكون قريب والشمس حارة تسيل لعراق والقلب للدموع دَرْ سْكيبْ تسالى الكلام وتسالاوْ لوراق نهار الفراق ما يفيد رغيب لساني بكم وما بغى تعياق وكبريائي دايرة رقيب اللّي يحلم لازمو لفياق وكلمة "لا" فقلبي شاعلة لهيب بمبروك النجاح ما نطقْ نطّاقْ حتى العديان كان قلبهم رْطيبْ قالوا اليوم لا بد من الفراق آجيوا نتوادعوا ونساوْا العيب أما أنا الوداع كان عليا شاق ما توصفوش حتى كلمة رهيب تفارقنا وتلف...

بحر الشعر ما دخلتو بلعاني غير انتِ اللي علمتيني نكتبْ كنتْ نباتْ سهرانْ نعاني في فراشي نتعذب شاعل وما باينْ دخاني نار قوية فيَّا تلهب بعدما كنت عايش هاني كلشي في حياتي مرتب غير شفتك ربّي بك بلاني وكل ما كنت بانيهْ تخرب الليالي ندوزها وحداني في نجوم السّما نحسب صورتك ما تحيد من بينْ عْياني غير نتفكرك قلبي يتعطبْ لوكانْ غيرْ جا برّاني نسمح فيه ونهرب عشتْ طير مكسر منْ جنحاني وكسري ما يجبّرو لقصبْ ثلاثينْ سنة فراقها رشّاني يا اللاّيم باراكا ما تستغربْ واخا ثَلْثْ سنينْ عدَّاتْ منْ زماني الحسنة عند الله فعشرة تتضربْ نقدر نحبها حتى يولّي لعمرْ فاني لكنْ أمر الله غْلبْ تمَّا مسحتْ دموعي واحزاني وعمرُو عنْ طوقُو شب كيفاش نحب اللي بكاني ورماني فِي غَيَابَاتْ الحُبّْ؟! يلا كان هذا حبيبي كيف يكونوا عدياني؟! على هاد السؤال ما قدرت نجاوبْ

 بسم الله الرحمن الرحيم والصلاة السلام على رسول الله وعلى آله وصحبه؛ السلام عليكم ورحمة الله تعالى وبركاته وبعد: فمرحبا بكم في موقع الزجال عبد اللطيف المجدوبي، والذي أتمنى أن يروقكم محتواه، وشكرا.