زجل

 زادو في لسعار ما راعاوش للمسكين ما عندو دخل قار عايش غي بالدين حتى الوجه راه صفار خاصو غي الدفين فالشارع يهرب من التجار مسكين يخونوه الرجلين ما عندو لا درهم لا دينار ولا مونة في الخزين دارو ما فيها لا نمل لا فار لا فتات لا شظية من لعجين وولادو مازالين صغار مسكين ما صاب عوين حتى المرا مشغولة فالدار التربية وزيد التصبين ومول الدار رسلو اشعار يخلص ولا يخرج فالحين ما نفعو قريب ولا جار ولا المرشح  البدين دمعو سايل مدرار ما قدر يمد اليدين لغير الواحد القهار هو وحدو الحنين

المال يجيب المحبة ولو من راس الجبل كاع لا تسبب عند الطلبة لا تسحر لا توكل اللي ما عندو حبة كلشي عليه يتبدل يفارقوه بلا سبة يدوي يقولو هبل غير ديوه للطبا تاريخ صلاحيتو كمل يعطيوه خبز واتاي وجبة والغني يحطو لو عجل يسمعوه الكلمة الرطبة كلامو يجيهم قرآن مرتل يصفقو عليه فكل خطبة حتى ملي يسعل كل طلباتو تتلبى القانون على قبلو يتعدل فالرونج تحلالو الركبة وفين بغى يوصل يمشي يخطب يقولولو مرحبا بالخير الله يكمل والفقير يطردوه من العتبة هو والقالب اللي يحمل

 نوصيك يا ولدي بالصبر باب الصبر ما عليه زحام لا تدوي حتى تفكر واخا يجرحك الكلام ما يهمكش اللي يغدر كاين اللي هو والغدر توام احمد الله معاه ما كملت عمر نسى الماضي وشوف لقدام المحبة ما هي بسيف ولا بمجمر ولا بفيسبوك ولا بانستغرام لا تحزنش ملي لخيرك تبذر واخا من الشر تحصد عرام اللي مشى في طريقك يحفر حفاريه تزل بيه فيها لقدام عند الله كلشي مكتوب مقدر وصبر الصابر ما يمشيش حرام كاع الناس تتساوي في لقبر والظالم ما ينفعوش رخام

هاد الضرسة ما زالا تابعاني حرها ما بغى يهدا هو اللي دواني طلع لي فراسي القردة معاها راني نعاني كي نحط راسي على المخدة تقول النعاس واش جاني حرامت عليا الرگدة بقيت ساهر وحداني ما نشكي لحدا ربي اللي عالم كي راني في وسط هاد الشدة بعدما سيدي عافاني شحال من مدة اليوم كيف ابتلاني ليه الحمد لبدا سبحانو عظمتو وراني فضرسة صغيرة فالقدة

  قدر الله بسم الله قصيدتي موظفة والحمد لله بها الميزان يكمل والصلاة والسلام على النبي المصطفى والآل والصحب واللي احسن العمل من قدر الله ما تهرب خلفة قالوا زمان طيرو عينو من يغفل حنا حسبناها عين بنادم بالصفة ونسينا العين حتى للما تشمل نحكي لكم ما صار فزاوية الشرفا أهل بوراشد المدور بجبل نار كسكاسو قالوا ما تطفى رد بالك يا من عليها باغي تدفل غير القدر الخاوي اللي ينكفى أما العامر عمرو ما ينزل وإلى نزل يرجع يوفى سبع سنابل الناس منها تكيل من سورة يوسف جمعت الوقفة وفي سورة البقرة حطات الرحل المظلوم يحلى نعاسو فوق الحلفة والظالم يبات فالخطط يبدل بعض الناس بلا رخصة مولفة تبير في وطى وجبل ناضوا حفروا حاسي بالخفة بالصوندا ماشي بالمعول حادر في أرض حايفة خرج ماه كالثعبان مغول 50 ليتر فكل طرفة ماه للدزيرة راه وصل والعين اللي فالعقبة معرفة بدا يبان فيها الوحل نقص ما العين راهو كفى والزيتون على فراقو ذبل والبكما ولات مسكينة عجفة ما بقى فالولجة ما تاكل ذنوبها على ظهركم مستفة حتى لعند ربي يوم الفصل ما كان لا رشوة لا معرفة ولا معا من الظالم يتصل راسلناهم طلبنا منهم الوصفة مرضنا باين الطبيب لاش معطل